Falar d'Edimburgu ye falar de cerveza. "La vieya afumiada", Auld Reekie, nomatu per el que dellos tovía y-dicen, llegó a tener cuarenta fábriques de cerveza allá per mediaos del siglu diecinove. Güey en día queden dos, una dientro del casu urbanu y descendiente de aquellos pioneros de la malta, Caledonian Brewery, y otra a les afueres, fundada allá pe'l añu 2003, establecía con muchu esfuerzu pero con bonos resultaos, lStewart Brewing Co. Cuando vivía n'Escocia, el destín- bono el destín y el bon conseyu de dos queríos collacios, llevome a vivir n'un preciosu edificiu de principios del sieglu venti, xusto a l'escontra Fountainbridge, llugar famosu per dos coses. La primera d'elles ye perque n'a colonia obrera que se acolumbraba dende la mio ventana había nacío y criáose, el gran Sean Connery, y la segunda y nun per ello menos importante, que a la vera la mio cai, taba la fábrica centenaria, Fountain Brewery, fundada por William Mcewan n'el 1856, baxo el llema de "To Copy it, is Forgery"- copiala ye tontería, traducío llibremente- y sede de la renomada Mcewan's.
Tornié fae dos años y lo que queda d'ella, depués de unos desastrosos años finales en manos de S&N primeru y depués de los holandesonos de Heineken, son eses roínes que véis, y que tanto me atristayaron cuando les retraté.
N'a memoria, olfativa, per más ende, y siempre encesa, tará grabau'l recuerdu de l'arume a malta que salía de los coceeros cada dos o tres díes, golor que inundaba l'ambiente y tanto me recordaba al de Colloto de cuando yera guaje. Haiga Salú
